Амло-Денк 10 мг (Amlo-denk 10mg)

Амло-Денк

10 мг

Амлодипин – Amlodipine

DenkPharma GmbH & Co.KG

Эмийн хэлбэр: Шахмал

ЭРҮҮЛ МЭНДИЙН ДААТГАЛЫН ҮНИЙН ХӨНГӨЛӨЛТ

Үнийн дээд хязгаар: 800

ЭМД хөнгөлөх хэмжээ: 240

Даатгуулагч төлөх дүн: 560

Эмчийн ангилал:

B, C, D

А, В - Ангиллын эмийг өрх, сум, тосгоны эрүүл мэндийн төв, клиникүүд

С - Ангиллын эмийг нэгдсэн эмнэлэг, хэвтүүлэн эмчлэх ортой клиник, амаржих газар, тусгай эмнэлэгүүд,

D - Ангиллын эмийг зөвхөн төрөлжсөн мэргэшлийн эмнэлгийн эмч бичих эрхтэй

Амло-Денк 10 бэлдмэл нь кальцийн суваг хориглогч бүлгийн бэлдмэл бөгөөд идэвхтэй бодис нь амлодипин юм.
Амло-Денк 10 бэлдмэлийг артерийн даралт ихсэх өвчин (гипертензи), болон цээжээр өвдөх зүрхний бах, Принцметалын ховор хэлбэр, зүрхний бахын эмчилгээнд хэрэглэнэ.
Цусны даралт өндөр байгаа өвчтөнд уг бэлдмэл нь судас тэлж цусны урсгалыг сайжруулна.  Зүрхний бахтай өвчтөнд Амло-Денк 10 бэлдмэл нь зүрхний булчингийн цусан хангамжийг сайжруулж хүчилтөрөгчийн хангамжийг нэмэгдүүлснээр цээжний өвдөлтийг намдаана. Уг бэлдмэл нь зүрхний бахын цээжний өвдөлтийг нэн даруй намдаахгүй.

Амлодипин эсвэл найрлага дахь бодист (6-р бүлгийг үзнэ үү) харшилтай, эсвэл бусад кальцийн сувгийн хориглогч бэлдмэлд харшилтай бол Амло-Денк 10 бэлдмэлийг хэрэглэхгүй. Энэ нь загатнах, арьс улайх, амьсгалахад  хүндрэлтэй байх шинж тэмдгээр  илэрдэг.
Цусны даралт хэт бага байх (гипотони).
Аортын хавхлагын нарийсалтай (аортын стеноз) болон зүрхний гаралтай шок (бие махбодийн цусан хангамж хангалтгүй  байх).
Зүрхний шигдээсийн дараах зүрхний дутагдалын үед тус тус хэрэглэхийг хориглоно.

Амлодипины ердийн эхлэх тун 5 мг ба хоногт нэг удаа хэрэглэнэ. Амлодипины хоногийн тунг 10 мг хүртэл нэмэгдүүлж болно.

Бэлдмэлийг хоол идэхийн өмнө ба дараа ууж хэрэглэнэ. Бэлдмэлийг өдөр бүр тогтмол цагт, хангалттай хэмжээний усаар даруулж ууна. Амло-Денк 10 бэлдмэлийг гоо жүржийн шүүсээр даруулж ууж болохгүй.

Хүүхэд, өсвөр насныхны хэрэглээ

Амлодипины эхлэх ердийн тун нь хоногт  2.5 мг. Зөвлөж буй хоногийн дээд тун нь 5 мг.  Амло- Денк 10 бэлдмэлийг таллаж 2.5 мг тун болгож болохгүй. Учир нь шахмал тэнцүү хэсэгт хуваагдахаар үйлдвэрлэгдээгүй.
Эмчилгээг тасралтгүй үргэлжлүүлэх нь чухал.

  Хэрэв Амло- Денк 10 бэлдмэлийн тунг хэтрүүлсэн тохиолдолд

Зөвлөж буй тунгаас  илүү олон шахмалыг хэрэглэвэл цусны даралт буурч, улмаар хэт буурсан тохиолдолд аюултай байдалд хүргэж болзошгүй. Толгой эргэх, толгой өвдөх, бие сулрах ухаан алдах шинж илэрнэ. Хэрэв цусны даралт ноцтой түвшинд буурвал шок үүсч болзошгүй. Арьс мэдээгүйжих, даарах мэдрэмж төрж ухаан алдаж болно.

Хэрэв Амло-Денк 10 бэлдмэлийг хэрэглэхээ мартсан тохиолдолд

Бэлдмэл хэрэглэхээ мартсан бол санаа зоволтгүй дараагийн тунг товлосон цагаараа үргэлжлүүлэн хэрэглэнэ. Мартсан тунг нөхөх зорилгоор давхарлаж хэрэглэхгүй.

Хэрэв Амло-Денк 10 бэлдмэлийг хэрэглэхээ зогсоох  тохиолдолд

Эмчилгээг зогсооход таны бие эмчилгээний өмнөх байдал эргэн орж болзошгүй.

Гэнэт амьсгаадах, цээжээр өвдөх,амьсгалахад хүндрэлтэй болох
Зовхи, нүүр, уруул хавагнах
Хэл, төвөнх хөөж хавагнаснаас  амьсгалахад хүндрэлтэй болох
Арьсны хүнд хэлбэрийн урвал болох бүх биеийн тууралт, гүвдрүү, улайлт, загатнаа, цэврүү, арьс хавдах, хавагнах, салст бүрхүүлийн үрэвсэл (Стивен-Жонсын хам шинж) эсвэл харшлын бусад урвалууд
Зүрх өвдөх, зүрх дэлсэх,
Нойр булчирхайн үрэвслээс шалтгаалсан нуруу, хэвлийн өвдөлт хавсарч бие ихээр тавгүйрхэх

Нийтлэг илрэх: 10 хэрэглэгчид  1 -ээс олон тохиолдох

Шагай хавагнах ( хаван)

Олонтаа илрэх: 100 хэрэглэгчид 1-10 – тохиолдох

Толгой өвдөх, толгой эргэх, нойрмоглох (ялангуяа эмчилгээний эхэнд)
Зүрх дэлсэх, нүүр минчийх
Хэвлийгээр өвдөх, дотор муухайрах
Хоолны шингэц муудах, гүйлгэх, өтгөн хатах
Бие сульдаж ядрах
Юмс бүрэлзэх, хоёрчлон харагдах
Булчин чангарах

Хааяа илрэх: 1000 хэрэглэгчид  1-10  тохиолдох

Сэтгэл түгших, айх, сэтгэл гутрах, нойргүйдэх
Чичрэх, бие тавгүйрхэх, ухаан балартах
Хөл, гар  бадайрах эсвэл чимчгэнэх, өвдөлтийн мэдрэмж алдагдах
Чих шуугих
Цусны даралт буурах
Хамрын хөндийн үрэвсэл, нус гоожих, найтаах (ринит)
Ханиалгах
Ам хуурайших, бөөлжих
Үс унах, их хөлрөх, арьс загатнах, хэсэг газар улайх, арьсны өнгө өөрчлөгдөх
Шээсний гарц өөрчлөгдөх, шөнө шээх, шээс задгайрах
Бэлгийн дур буурах, эрчүүдэд хөх хөндүүрлэх, томрох
Бие өвдөх
Булчин, үеэр өвдөх, нуруу өвдөх
Биеийн жин ихсэх, буурах

Ховор илрэх: 10000 хэрэглэгчид  1-10 тохиолдох

Баримжаа алдагдах

  Маш ховор илрэх: 10000 хэрэглэгчид 1-ээс цөөн тохиолдох

Цусны цагаан эс болон ялтсан эсийн тоо буурснаар  хөхрөх, цус алдах эрсдэл нэмэгдэх (цусны улаан эс гэмтэх)
Цусан дахь сахарын хэмжээ нэмэгдэх (гипергликеми)
Мэдрэлийн судлын эмгэгээс шалтгаалж бие сульдах, мэдээ алдах бадайрах
Буйл хавдах
Ходоод цанхайх (гастрит)
Элэгний үйл ажиллагаа алдагдах, элэгний үрэвсэл, арьс шарлах, шинжилгээнд элэгний үйл ажиллагааны үзүүлэлтүүдийн хэмжээ нэмэгдэх
Булчингийн чангарал нэмэгдэх
Судас үрэвссэнээс арьс улайх
Гэрэлд мэдрэгших
Булчингийн хөшингө, салга эсвэл хөдөлгөөний эмгэг

Гаж нөлөөг мэдээлэх

Илэрсэн гаж нөлөөг мэдээлэх нь энэ бэлдмэлийн аюулгүй байдлын мэдээллийг сайжруулахад тус болох юм.

Эмийн эмчилгээний бүлэг: Кальцийн суваг хориглогч бэлдмэл. Кальцийн сувгийг сонгомолоор хориглож судсанд нөлөөлнө.
Амлодипин нь дигидропиридины  бүлгийн (кальцийн ионы сувгийн хориглогч буюу антагонист) кальцийн ионы сувгийг хориглогч бэлдмэл бөгөөд зүрхний болон судасны гөлгөр булчингийн эсийн мембранаар кальцийн ион нэвтрэхийг саатуулна. Амлодипин нь судасны гөлгөр булчинг сулруулж цусны даралтыг бууруулах үйлдэлтэй.

Шимэгдэлт/Тархалт/Сийвэнгийн уурагтай холбогдолт

Амлодипиныг эмчилгээний тунгаар ууж хэрэглэснээс хойш 6-12 цагийн дараа цусны сийвэнд дээд хэмжээндээ хүрнэ. Туйлын биохүрэхүй нь 64-80%. Тархалтын эзлэхүүн ойролцоогоор 21 л/кг. In vitro  судалгаагаар амлодипины цусны сийвэнгийн уурагтай холбогдолт нь ойролцоогоор 97.5% . Амлодипины биохүрэхүй нь хоол хүнснээс хамааралгүй байдаг.

Хувирал/ Ялгаралт

Хоногт нэг удаа, тогтмол тунгаар хэрэглэхэд хагас ялгарлын хугацаа 35-50 цаг. Амлодипины ихэнх хэсэг нь элгэнд хувирч идэвхгүйжнэ. 60%   нь холбоот хэлбэрээр, 10% нь идэвхгүй хэлбэрээр биеэс шээсээр ялгарна.

Амло-Денк 10 бэлдмэл нь зарим эмүүдийн үйлдэлд нөлөөлж болзошгүй. Жишээлбэл:

кетоназол, интраконазол (мөөгөнцрийн эсрэг эмүүд)
ритонавир, индинавир, нелфинавир (ХДХВ-ийг эмчилгээнд хэрэглэх протеаза дарангуйлагчид)
рифампицин, эритромицин, кларитромицин (антибиотикууд)
алтан цэгцүүхэй Hypericum perforatum (St.Johnп’s Wort)
верапамил, дилтиазем (зүрхний үйл ажиллагаанд нөлөөлөх эмүүд)
дантролене (биеийн хэмийн хямралын үед дуслаар хэрэглэх бэлдмэл)
такролимус (дархлаа зохицуулах эмийн бэлдмэл)
симвастатин (цусан дахь холестерины хэмжээг бууруулах бэлдмэл)
циклоспорин (дархлаа дарангуйлах бэлдмэл)

Хэрэв та цусны даралт бууруулах бусад бэлдмэл хэрэглэж байгаа бол амлодипиныг хэрэглэхэд цусны даралт хэт буурч болзошгүй.

Дараах тохиолдлууд танд илэрч буй эсвэл илэрч байсан бол эмчид мэдэгдэнэ үү. Үүнд:

Зүрхний шинэ шигдээс
Зүрхний дутагдал
Цусны даралт хэт ихсэх (гипертонийн криз)
Элэгний эмгэг
Таны нас өндөр бол тус тус хэрэглэх тунг багасгах шаардлагатай

Хүүхэд ба өсвөр насныхны хэрэглээ

6-с доош насны хүүхдэд Амлодипины үзүүлэх нөлөө судлагдаагүй. Амлодипиныг даралт ихсэх өвчний үед зөвхөн 6-17 насны хүүхэд ба өсвөр  насныханд хэрэглэнэ (3-р   хэсгийг үзнэ үү). Нэмэлт мэдээллийн талаар эмчлэгч эмчтэйгээ ярилцана уу.

Жолоо барих ба машин механизмтай ажиллах

Амло-Денк 10 бэлдмэл нь жолоо барих ба машин механизмтай ажиллах чадварт нөлөөлж болзошгүй. Хэрэв шахмалыг ууж хэрэглэсний дараа бие эвгүйрхэх, ядрах, толгой эргэх, өвдөх шинж илэрсэн тохиолдолд жолоо барихгүй, машин механизмтай ажиллахгүйгээр эмчид яаралтай хандана уу.

Амло-Денк 10 бэлдмэлийг хоол хүнсний зүйлтэй хамт хэрэглэх нь

Амло-Денк 10 бэлдмэл хэрэглэж байхад гоо жүржийн шүүсийг хамт хэрэглэхгүй. Учир нь  гоо жүрж болон түүний шүүс нь цусан дахь амлодипины идэвхтэй хэлбэрийн хэмжээг ихэсгэснээр Амло-Денк 10 бэлдмэл нь цусны даралтыг урьдчилан тааварлашгүйгээр  бууруулах үйлдэл үзүүлж болзошгүй.

Хэрэв та жирэмсэн ба хөхүүл, жирэмсэн байж магадгүй, эсвэл жирэмслэхээр төлөвлөж байгаа бол бэлдмэлийг хэрэглэхийн өмнө эмч, эм зүйчээс зөвлөгөө авна уу.

 Жирэмсэн үе

Амлодипиныг жирэмсэн үед хэрэглэхэд аюулгүй гэдэг нь  тогтоогдоогүй. Хэрэв та жирэмсэн байж магадгүй, эсвэл жирэмслэхээр төлөвлөж байгаа бол Амло Денк 10 бэлдмэл хэрэглэхийн өмнө эмчдээ мэдэгдэнэ үү.

Хөхүүл үе

Амлодипин бага хэмжээгээр хөхний сүүгээр ялгардаг. Хэрэв та хүүхдээ хөхөөр хооллодог эсвэл хөхөөр хооллохоор төлөвлөж байгаа  бол Амло-Денк 10 бэлдмэл   хэрэглэхийн өмнө эмчдээ мэдэгдэнэ үү.

Амло- Денк 10 бэлдмэлийн найрлага

Идэвхтэй үйлчлэгч бодис: Амлодипин.
Нэг шахмалд 12.79 мг амлодипин месилат 1 Н2О  агуулагдах ба 10 мг Амлодипинтэй тэнцэнэ.
Туслах бодис: бичил талстат целлюлоз, кальцийн гидроген фосфат ангидроз, натрийн гликолат, магнийн стеарат.

Амло-Денк 10 бэлдмэлийн дүрслэл, савлалт

Амло- Денк 10 бэлдмэл нь цагаан өнгөтэй, дугуй хэлбэртэй, хоёр талдаа гүдгэр шахмал. Амло Денк 10 шахмал нь PVC/PE/PVDC- хөнгөн цагаан блистерт савлагдана.
Хайрцагтаа 50 ширхэг шахмал байна.

Маркетингийн итгэмжлэгдсэн эзэмшигч ба үйлдвэрлэгч

DENK PHARMA GmbH & Co. KG

Prinzregentenstr.79

81675 Munchen

Germany

Үйлдвэрлэсэн газар

Gollstr.1

84529 Tittmoning

Germany

Үйлдвэрлэгч мэдээлэл

Савлагааны мэдээлэл