Валсар-Денк (Valsar-Denk)

Валсар-Денк

160 мг

Валсартан – Valsartan

Denk Pharma GmbH & Co.KG

Эмийн хэлбэр: Шахмал

ЭРҮҮЛ МЭНДИЙН ДААТГАЛЫН ҮНИЙН ХӨНГӨЛӨЛТ

Үнийн дээд хязгаар: 840

ЭМД хөнгөлөх хэмжээ: 252

Даатгуулагч төлөх дүн: 588

Эмчийн ангилал:

B, C, D

А, В - Ангиллын эмийг өрх, сум, тосгоны эрүүл мэндийн төв, клиникүүд

С - Ангиллын эмийг нэгдсэн эмнэлэг, хэвтүүлэн эмчлэх ортой клиник, амаржих газар, тусгай эмнэлэгүүд,

D - Ангиллын эмийг зөвхөн төрөлжсөн мэргэшлийн эмнэлгийн эмч бичих эрхтэй

Валсар-Денк 160 бэлдмэл нь ангиотензин II-ийн рецепторыг саатуулагч эмийн бүлэгт хамаардаг бөгөөд цусны өндөр даралтыг хянахад тусална. Ангиотензин II гэдэг нь судсыг нарийсгаж улмаар цусны даралтыг ихэсгэдэг бие махбодод үүсдэг бодис юм. Валсар-Денк 160 бэлдмэл нь ангиотензин II-ийн энэ үйлдлийг хориглодог. Үүний үр дүнд цусны судас өргөсөж цусны даралт буурна. Валсар-Денк 160 бэлдмэлийг өөр хоорондоо ялгаатай дараах гурван тохиолдолд хэрэглэж болно.

Насанд хүрэгсэд, хүүхэд болон 6-18 насны өсвөр үеийнхний цусны өндөр даралтыг эмчлэх зорилгоор хэрэглэнэ.
- Цусны өндөр даралт нь зүрх ба судасны ачааллыг нэмэгдүүлдэг. Хэрэв үүнийг эмчлэхгүй бол тархи, зүрх, бөөрний цусны судсыг гэмтээж улмаар цус харвалт, зүрхний дутагдал эсвэл бөөрний дутагдал үүсгэнэ. Цусны өндөр даралт зүрхний булчингийн шигдээс үүсэх эрсдлийг нэмэгдүүлдэг. Цусны даралтыг хэвийн хэмжээнд хүртэл бууруулах нь эдгээр эмгэг үүсэх эрсдлийг багасгана.
Зүрхний булчингийн шигдээсээр өвдөөд удаагүй байгаа насанд хүрэгсдийн эмчилгээнд хэрэглэнэ.
- “Удаагүй” гэдэг нь 12 цагаас 10 хоног хүртэл хугацааг хамааруулна.
Насанд хүрэгсдийн шинж тэмдгийн зүрхний дутагдлыг эмчлэх зорилгоор хэрэглэнэ.
- Валсар-Денк 160 бэлдмэлийг ангиотензин хувиргагч фермент (АХФ)-ийг саатуулдаг бүлгийн бэлдмэлийг (зүрхний дутагдлын эмчилгээнд хэрэглэдэг бэлдмэл) хэрэглэх боломжгүй үед хэрэглэх буюу эсвэл бета блокаторыг (зүрхний дутагдлын эмчилгээнд хэрэглэдэг өөр бэлдмэл) хэрэглэх боломжгүй үед АХФ-ийг саатуулдаг бэлдмэл дээр нэмэлтээр хэрэглэж болно. Зүрхний дутагдлын үед биед шингэн хуримтлагдсантай холбоотой амьсгаадах болон хөл хавагнах шинж илэрдэг.Энэ нь зүрхний булчин биеийн бүх хэсэгт шаардлагатай цусыг хангалттай хүчээр шахаж чадахгүй үед үүсдэг.

Валсартан, шар буурцаг, газрын самар болон бэлдмэлийн найрлага дахь бусад бодист (6-р хэсгээс харна уу)  харшилтай  хүмүүс

Хүнд явцтай элэгний эмгэгтэй хүмүүс
Жирэмсний сүүлийн 6 сарын турш. Мөн Валсар-Денк 160 бэлдмэлийг жирэмсний эрт үед хэрэглэхээс зайлсхийх нь зүйтэй (Жирэмсэн үеийн хэрэглээ хэсгээс харна уу).

Бэлдмэлийг эмчийн зааврыг нарийн баримтлан хэрэглэнэ. Хэрэв ойлгомжгүй зүйл байвал эмчлэгч эмч болон эм зүйчээс асууна. Цусны өндөр даралттай хүмүүст уг эмгэгийн ямар нэгэн шинж тэмдэг ихэвчлэн анзаарагддаггүй. Дийлэнх тохиолдолд бараг хэвийн байдаг. Хэдийгээр таны биеийн байдал сайн байгаа ч гэсэн эмчдээ тогтмол үзүүлж байх нь илүү чухал.

Цусны өндөр даралттай насанд хүрэгсдэд
- Ердийн тун нь 80мг валсартаныг өдөрт нэг удаа хэрэглэнэ. Зарим тохиолдолд эмчлэгч эмч танд өндөр тунгаар (160мг эсвэл 320мг) бичиж болно. Түүнчлэн Валсар-Денк 160 бэлдмэлийг нэмэлт бэлдмэлтэй (шээс хөөх эм гэх мэт) хамт хавсарч хэрэглэж болно.
Цусны өндөр даралттай хүүхэд ба өсвөр насныханд (6-18 настай):
- 35 кг-аас бага жинтэй хүүхдэд хэрэглэх ердийн тун нь 40мг валсартаныг өдөрт нэг удаа хэрэглэнэ.
- 35 ба түүнээс дээш жинтэй хүүхдэд хэрэглэх ердийн тун нь 80мг валсартаныг өдөрт нэг удаа эхэлж хэрэглэнэ. Зарим тохиолдолд эмчлэгч эмч өндөр тунгаар (тунг 160мг хүртэл ихэсгэж болох ба хамгийн дээд тун 320мг) бичиж болно.
Зүрхний булчингийн шигдээсээр өвдөөд удаагүй байгаа насанд хүрэгсдийн эмчилгээнд
- Зүрхний булчингийн шигдээсийн дараа эмчилгээг ерөнхийдөө 12 цагийн дараа аль болох эрт эхлэх ба голдуу 20мг тунгаар хоногт 2 удаа хэрэглэнэ. Эмчлэгч эмч энэ тунг хэдэн долоо хоногийн хугацаанд аажим ихэсгэж  дээд тун буюу 160мг-аар хоногт 2 удаа хэрэглэх хүртэл нэмэгдүүлж болно. Эцсийн тун нь өвчтөн бүрийн зохимжоос хамаарна.
- Валсар-Денк 160 бэлдмэлийг зүрхний булчингийн шигдээсийн бусад эмчилгээтэй хамт хэрэглэж болох бөгөөд эмчлэгч эмч танд ямар эмчилгээ тохиромжтойг шийднэ.
Зүрхний дутагдалтай насанд хүрэгсдэд
- Эмчилгээг ерөнхийдөө 40мг тунгаар хоногт 2 удаа хэрэглэж эхэлнэ. Эмчлэгч эмч энэ тунг хэдэн долоо хоногийн хугацаанд аажмаар ихэсгэж дээд тун буюу 160мг-аар хоногт 2 удаа хэрэглэх хүртэл нэмэгдүүлж болно. Эцсийн тун нь өвчтөн бүрийн зохимжоос хамаарна.
- Валсар-Денк 160 бэлдмэлийг зүрхний дутагдлын бусад эмчилгээтэй хамт хэрэглэж болох ба эмчлэгч эмч танд ямар эмчилгээ тохиромжтойг шийднэ.
Зөвлөж буй ерөнхий тун
- Валсар-Денк 160 бэлдмэлийг хоол хүнсний зүйлтэй хамт эсвэл хоолгүй хэрэглэж болно. Бэлдмэлийг аяга усаар даруулан залгиж ууна. Валсар-Денк 160 бэлдмэлийг өдөр бүрийн ижил цагт ууж хэрэглэнэ.
- Валсар-Денк бэлдмэл нь 3 тунтай байдаг: 80мг, 160мг ба 320мг. Валсар-Денк бэлдмэлийн дээрх бүх тун бүхий шахмалыг 2 тэнцүү хэсэгт хувааж болно.
Валсар-Денк 160 бэлдмэлийн тун хэтэрсэн тохиолдолд
- Хэрэв танд хүнд явцтай толгой эргэх эсвэл муужрах шинж илэрвэл  нэн даруй эмчдээ хэлэх бөгөөд хэвтэнэ. Хэрэв санамсаргүйгээр их хэмжээний шахмал хэрэглэсэн тохиолдолд эмч, эм зүйч эсвэл эмнэлэгт мэдэгдэнэ.
Валсар-Денк 160 бэлдмэлийг хэрэглэлгүй мартаж өнгөрөөсөн бол
- Хэрэв та тунг мартаж өнгөрөөсөн бол санасан даруйдаа хэрэглэнэ. Гэвч дараагийн тунг хэрэглэх цаг бараг болсон байвал мартаж өнгөрөөсөн тунгаа алгасна. Мартаж өнгөрөөсөн тунг нөхөхийн тулд тунг давхарлаж хэрэглэж болохгүй.
Валсар-Денк 160 бэлдмэлийн эмчилгээг зогсоох:
- Валсар-Денк 160 бэлдмэлийн эмчилгээг зогсоох нь таны өвчнийг улам хүндрүүлж болно. Эмчийн зөвшөөрөлгүйгээр  эмчилгээг зогсоож болохгүй.

Хэдийгээр Валсар-Денк 160 бэлдмэлийг хэрэглэх үед бусад эмийн бэлдмэлийн нэгэн адилаар гаж нөлөө ажиглагдах боловч энэ нь бүх хүмүүст илэрдэггүй. Бэлдмэлийг хэрэглэх үед илрэх гаж нөлөөний давтамжийг дараах байдлаар ангилна.

Байнга илрэх: 10 өвчтөнд 1-с олон тохиолдох.
Олонтаа илрэх: 100 өвчтөнд 1-10 тохиолдох.
Хааяа илрэх: 1000 өвчтөнд 1-10 тохиолдох.
Ховор илрэх: 10000 өвчтөнд 1-10 тохиолдох.
Маш ховор илрэх: 10000 өвчтөнд 1-с цөөн тохиолдох.
Тодорхойгүй: Байгаа мэдээллээс тооцох боломжгүй.

Зарим шинж тэмдэгт эмнэлгийн яаралтай тусламж шаардагддаг

Танд нүүр, уруул, хэл, хоолой хавагнах, амьсгалахад болон залгихад бэрхшээлтэй болох, чонон хөрвөс, загатнах зэрэг судасны хавангийн (харшлын өвөрмөц урвал) шинж тэмдэг илэрч болно.

Илэрч болох бусад гаж нөлөө

Олонтаа илрэх
- Толгой эргэх
- Босоо байрлалд шилжих үед толгой эргэх, муужрах зэрэг шинж илрэх болон илрэхгүйгээр цусны даралт багасах
- Бөөрний үйл ажиллагаа буурах (бөөрний үйл ажиллагааны алдагдлын шинж)
Хааяа илрэх
- Судасны гаралтай хаван (Зарим шинж тэмдэгт эмнэлгийн яаралтай тусламж шаардагддаг гэсэн хэсгээс харна уу).
- Гэнэт ухаан алдах (синкопи)
- Эргэлдэх мэдрэмж төрөх (толгой эргэх)
- Бөөрний үйл ажиллагаа хүнд явцтай буурах (бөөрний цочмог дутагдлын шинж)
- Булчин агчих, зүрхний хэмнэл алдагдах (цусан дахь калийн хэмжээ ихсэлтийн шинж)
- Амьсгаадах, хэвтэх үед амьсгалахад бэрхшээлтэй болох, хөл хавагнах (зүрхний дутагдлын шинж)
- Толгой өвдөх
- Ханиалгах
- Хэвлийгээр өвдөх
- Дотор муухайрах
- Суулгах
- Ядрах
- Бие сулрах
Тодорхойгүй
- Туурах, загатнах, чонон хөрвөс гарах зэрэг харшлын урвал; халуурах, үеэр хавдах, үеэр өвдөх, булчин өвдөх, тунгалгийн зангилаа томрох ба томуу төст шинж тэмдэг илэрч болно (ийлдсийн өвчний  шинжүүд).
- Хөх ягаан-улаан толбо гарах, халуурах, загатнах (васкулит буюу цусны судасны үрэвслийн шинж тэмдэг)
- Хэвийн бус цус алдалт, хөхрөх (цусан дахь тромбоцитын тоо цөөрлийн шинж тэмдэг)
- Булчин өвдөх (миалгия)
- Халдварын улмаас халуурах, хоолой өвдөх, ам шархлах (нейтропени буюу цусан дахь цагаан эсийн тоо цөөрлийн шинж тэмдэг)
- Гемоглобины хэмжээ багасах болон цусан дахь улаан эсийн эзлэх хувь буурах (хүнд тохиолдолд цус багадалтанд хүргэнэ)
- Цусан дахь калийн хэмжээ ихсэх (триггер булчин агчих ба хүнд тохиолдолд зүрхний хэмнэл алдагдах)
- Элэгний үйл ажиллагааны үзүүлэлтүүд ихсэх (элэгний гэмтлийг заана). Үүнд: цусан дахь билирубины хэмжээ ихсэх (хүнд тохиолдолд арьс ба нүд шарлах)
- Цусан дахь мочевины хэмжээ ихсэх болон сийвэнгийн креатинины хэмжээ ихсэх (бөөрний үйл ажиллагааны алдагдлыг заана)
- Цусан дахь натрийн хэмжээ багасах (хүнд тохиолдолд ядрах, ухаан балартах, булчин татвалзах эсвэл эпилепсийн уналтад хүргэж болно)
Зарим гаж нөлөөний давтамж таны биеийн байдлаас хамаарч янз бүр байж болно. Жишээлбэл: толгой эргэх, бөөрний үйл ажиллагаа буурах зэрэг гаж нөлөө нь цусны өндөр даралттай эмчилгээ хийлгэсэн насанд хүрсэн хүмүүст зүрхний дутагдал болон зүрхний булчингийн шигдээсийн дараах эмчилгээ хийлгэсэн хүмүүсээс цөөн давтамжтай илэрч байсан.
Маш ховор тохиолдолд шар буурцагны лецитин харшлын урвал үүсгэж болно.
Хүүхэд ба өсвөр насныханд илрэх гаж нөлөө насанд хүрсэн хүмүүсийнхтэй төстэй байна.

Валсартан нь ууж хэрэглэхэд үр дүнтэй, хүчтэй үйлдэлтэй, ангиотензин II (анг II)-ийн рецепторыг хориглодог өвөрмөц бэлдмэл.
Валсартан нь ангиотензин II-ийн мэдэгдэж буй үйлдлийг хариуцдаг ангиотензин-1 рецепторын дэд хэлбэрт сонгомлоор үйлчилдэг. Валсартан ангиотензин-1 рецепторт хориг үүсгэсний дараа ангиотензин II-ийн сийвэнгийн түвшин ихэсч улмаар хориглогдоогүй ангиотензин-2 рецепторыг сэргээснээр ангиотензин-1 рецепторын нөлөөг тэнцвэржүүлдэг.
Валсартан нь ангиотензин-1 рецепторт хэсэгчилсэн идэвхжүүлэх үйлдэл үзүүлдэггүй бөгөөд түүний ангиотензин-1 рецептортой төстэй чанар нь ангиотензин-2 рецептороос хавьгүй илүү байдаг (ойролцоогоор 20000 дахин их).
Валсартаны бусад дааврын рецептор болон зүрх судасны зохицуулгад чухал үүрэгтэй ионы сувагтай холбогддог эсвэл хориг үүсгэдэг эсэх нь тодорхойгүй байна.
Валсартан нь ангиотензин I-ээс ангиотензин II-ийг үүсгэдэг болон брадикининыг задалдаг АХФ-т (мөн кининаза II болох нь мэдэгдсэн) саатуулах нөлөө үзүүлдэггүй. АХФ-д нөлөөлдөггүй, брадикинин ба Р бодисыг хүчжүүлдэггүй учир ангиотензин II-ийн рецепторыг хориглогч бэлдмэлүүд нь ханиалга үүсгэх шинжгүй байдаг.

Шимэгдэлт

Валсартаныг дангаар нь ууж хэрэглэсний дараа сийвэнгийн  концентраци нь  2-4 цагийн дотор дээд хэмжээндээ хүрдэг.
Дундаж туйлын биохүрэхүй нь 23%. Хэдийгээр валсартаныг хэрэглэснээс хойш 8 цагийн дараа түүний сийвэнгийн концентраци нь хооллосон болон өлөн үеийн бүлэгт адил байсан боловч хоол хүнсний зүйл валсартаны илрэлийг (AUC-ээр үнэлдэг) 40% орчим, сийвэнгийн дээд концентрацийг (Cmax) 50% орчмоор тус тус бууруулдаг. AUC-ийн уг бууралт байхгүй үед ч  эмчилгээний үр нөлөөний эмнэлзүйн ач холбогдол бүхий бууралт дагалдаж илэрдэг учир валсартаныг хоолтой хамт болон хоолгүйгээр хэрэглэж болно.

Тархалт

Бэлдмэлийг судсанд тарьж хэрэглэсний дараах валсартаны тогтвортой тархалтын эзэлхүүн 17 литр орчим байдаг нь валсартан эдийн дотор их хэмжээгээр тархдаггүйг харуулдаг.
Валсартан сийвэнгийн уурагтай (гол төлөв сийвэнгийн альбумин) их хэмжээгээр (94-97%) холбогддог.

Биотрансформаци

Валсартан их хэмжээгээр биотрансформацид ордоггүй. Хэрэглэсэн тунгийн зөвхөн 20% орчим нь метаболит үүсгэдэг. Гидрокси метаболит нь бага концентрациар (валсартаны AUC-ийн 10%-иас бага) сийвэнд тодорхойлогддог. Энэхүү метаболит нь эмчилгээний идэвхгүй.

Ялгаралт

Валсартан  экспоненциаль бууралтын кинетик (t½ α<1 цаг болон t½β 9 цаг орчим) үзүүлдэг. Валсартан үндсэндээ цөстэй хамт өтгөнөөр (тунгийн 83% орчим) болон шээсээр (тунгийн 13% орчим) гол төлөв өөрчлөгдөөгүй хэлбэрээр гадагшилдаг.
Бэлдмэлийг судсанд тарьж хэрэглэсний дараа түүний сийвэнгийн клиренс ойролцоогоор 2 л/цаг байх ба бөөрний клиренс нь 0.62 л/цаг (нийт клиренсийн 30% орчим) байдаг. Валсартаны хагас задралын хугацаа 6 цаг

Хэрэв Валсар-Денк 160 бэлдмэлийг тодорхой төрлийн бусад эмийн бэлдмэлтэй хамт хэрэглэвэл эмчилгээний үр дүнд нөлөөлнө. Ингэснээр  тунг өөрчлөх, бусад болгоомжлох арга хэмжээ авах, зарим тохиолдолд эдгээр бэлдмэлийн аль нэгийг хэрэглэхээ зогсоох шаардлага гарч болно. Үүнд жороор олгодог болон жороор олгодоггүй бэлдмэлийн аль аль нь хамаарна. Ялангуяа:

Цусны даралт бууруулдаг бусад бэлдмэл (ялангуяа шээс хөөх эм)
Цусан дахь калийн хэмжээг ихэсгэдэг бэлдмэл. Үүнд калийн нэмэлт бүтээгдэхүүн, кали агуулсан давс орлуулагч, калийн ялгаралтыг хориглодог бэлдмэл ба гепарин орно.
Стероид бус бүтэцтэй үрэвслийн эсрэг бэлдмэл (СББҮЭБ) гэж нэрлэгддэг зарим төрлийн өвдөлт намдаах эм
Зарим антибиотик (рифамицины бүлэг), шилжүүлэн суулгасан эд ховхрохоос сэргийлэх бэлдмэл (циклоспорин), ХДХВ/ДОХ-ын эмчилгээнд хэрэглэдэг ретровирусын эсрэг бэлдмэл (ритонавир). Эдгээр бэлдмэл Валсар-Денк 160 бэлдмэлийн үр нөлөөг ихэсгэнэ.
Зарим төрлийн сэтгэцийн эмгэгийн эмчилгээнд хэрэглэдэг бэлдмэл болох литий.
Хэрэв та зүрхний шигдээсийн дараах эмчилгээ хийлгэж байгаа бол Валсар-Денк 160 бэлдмэлийг АХФ-ийг саатуулдаг бэлдмэлтэй (зүрхний шигдээсийн  эмчилгээнд хэрэглэдэг) хавсарч хэрэглэхийг зөвлөхгүй.
Хэрэв та зүрхний дутагдлын эмчилгээ хийлгэж байгаа бол Валсар-Денк 160 бэлдмэлийг АХФ-ийг саатуулдаг бэлдмэл, бета блокатор (зүрхний дутагдлын эмчилгээнд хэрэглэдэг бэлдмэл)-тай хавсарч гурвалсан эмчилгээ хийхийг зөвлөхгүй.

Валсар-Денк 160 бэлдмэлийг хэрэглэхийн өмнө эмч ба эм зүйчдээ мэдэгдээрэй.

Хэрэв та элэгний эмгэгтэй бол
Хэрэв та бөөрний эмгэгтэй эсвэл диализ-д байгаа бол
Хэрэв та бөөрний артерийн нарийсалтай бол
Хэрэв та бөөр шилжүүлэн суулгаад (шинэ бөөртэй болох) удаагүй байгаа бол
Хэрэв та зүрхний шигдээсийн дараах эсвэл зүрхний дутагдлын эмчилгээ хийлгэсэн бол эмч таны бөөрний үйл ажиллагааг шалгаж болно.
Хэрэв та зүрхний дутагдал ба зүрхний шигдээсээс бусад хүнд явцтай зүрхний эмгэгтэй бол
Бусад эмийн бэлдмэлийг (үүнд АХФ-ийг саатуулдаг бэлдмэл орно) хэрэглэж байх үед харшлын урвалаар үүсгэгдсэн судасны гаралтай хаван буюу хэл ба нүүрний хаван илэрч байсан бол

Хэрэв Валсар-Денк 160 бэлдмэлийг хэрэглэж байх үед эдгээр шинж тэмдэг илэрвэл бэлдмэлийг хэрэглэхээ нэн даруй зогсоох ба дахин хэрэглэж болохгүй. “Илэрч болох гаж нөлөө” гэсэн хэсгээс харна уу.

Хэрэв та цусан дахь калийн хэмжээг ихэсгэдэг бэлдмэл хэрэглэж байгаа бол. Үүнд: Калийн нэмэлт бүтээгдэхүүн, кали агуулсан давс орлуулагч, калийн ялгаралтыг хориглодог бэлдмэл ба гепарин орно. Цусан дахь калийн хэмжээг тогтмол завсарлагатайгаар шалгах шаардлага гарч болно.
Хэрэв та 18-с доош настай, эсвэл Валсар-Денк 160 бэлдмэлийг ренин ангиотензин альдостероны системийг саатуулдаг (цусны даралт бууруулдаг бэлдмэл) бусад бэлдмэлтэй хавсарч хэрэглэж байгаа бол эмч таны бөөрний үйл ажиллагааг шалгах ба тогтмол завсарлагатайгаар цусан дахь калийн хэмжээг хянана.
Хэрэв та альдостеронизмоор өвдөж байгаа бол. Энэ нь бөөрний дээд булчирхай альдостерон дааврыг маш их хэмжээгээр ялгаруулдаг эмгэг. Хэрэв энэ эмгэг танд илэрвэл Валсар-Денк 160 бэлдмэлийг хэрэглэхийг зөвлөхгүй.
Хэрэв суулгах, бөөлжих ба шээс хөөх эмийг (диуретик) өндөр тунгаар хэрэглэснээс бие махбод их хэмжээний шингэн алдсан бол (үсгүйжил).
Хэрэв та өөрийгөө жирэмсэн болсон (эсвэл жирэмсэн байж магадгүй) гэж бодож байгаа бол эмчид заавал мэдэгдээрэй. Бэлдмэлийг жирэмсний эрт үед хэрэглэхийг зөвлөхгүй ба жирэмсний 3 сараас дээш хугацаанд хэрэглэхийг хориглоно. Учир нь Валсар-Денк 160 бэлдмэлийг жирэмсний энэ үед хэрэглэвэл таны хүүхдэд ноцтой аюул учруулж болзошгүй (Жирэмсэн үеийн хэрэглээ хэсгээс харна уу).

Жолоо барих ба машин механизмтай ажиллах чадварт бэлдмэлийн үзүүлэх нөлөө

Тээврийн хэрэгсэл жолоодох, тоног төхөөрөмж ашиглах, машин механизм ажиллуулах болон анхаарал төвлөрүүлэлт шаардсан бусад үйл ажиллагаа хийхийн өмнө Валсар-Денк 160 бэлдмэл танд хэрхэн нөлөөлөх талаар мэдэх нь зүйтэй.
Цусны өндөр даралтыг эмчлэхэд хэрэглэдэг бусад олон бэлдмэлийн адил Валсар-Денк 160 бэлдмэлийг хэрэглэх үед ховор тохиолдолд толгой эргэх ба тэрээр анхаарал төвлөрүүлэх чадварт нөлөөлж болно.

Жирэмсэн үе

Хэрэв та өөрийгөө жирэмсэн болсон (эсвэл жирэмсэн байж магадгүй) гэж сэжиглэж байгаа бол эмчид мэдэгдээрэй. Эмч танд жирэмсэн болохоос өмнө эсвэл жирэмсэн гэдгээ мэдмэгцээ Валсар-Денк 160 бэлдмэлийг хэрэглэхээ зогсоох ердийн зөвлөгөө өгөх ба Валсар-Денк 160 бэлдмэлийн оронд өөр бэлдмэл хэрэглэхийг зөвлөнө. Бэлдмэлийг жирэмсний эрт үед хэрэглэхийг зөвлөхгүй ба жирэмсний 3 сараас хойших хугацаанд хэрэглэхийг хориглоно. Учир нь бэлдмэлийг жирэмсний 3 дахь сараас хойш хэрэглэвэл таны хүүхдэд ноцтой аюул үүсэж болно.

Хөхүүл үе

Хэрэв та хөхүүл эсвэл хөхөөр хооллож эхэлж байгаа бол эмчдээ мэдэгдээрэй. Бэлдмэлийг хөхүүл үед хэрэглэхгүй бөгөөд хэрэв та хүүхдээ хөхөөр хооллохыг хүсэж байгаа бол (ялангуяа таны хүүхэд шинэ төрсөн нярай эсвэл хугацаанаасаа өмнө дутуу төрсөн бол) эмч танд өөр эмчилгээ сонгоно.

Бэлдмэлийг хүүхэд үзэж хүрэхээргүй газар хадгална.
Цаасан хайрцаг болон блистер дээр тэмдэглэсэн хүчинтэй хугацаа дууссанаас хойш бэлдмэлийг хэрэглэхгүй. Хүчинтэй хугацаа нь тухайн сарын сүүлийн өдөр дуусна.
Хүчинтэй хугацаа: 36 сар
25°С-с доош хэмд хадгална.

Валсар-Денк 160 бэлдмэлийн найрлага

Үйлчлэгч бодис нь валсартан.
Нэг ширхэг нимгэн бүрхүүлтэй шахмалд 160 мг валсартан агуулагдана.
Бусад туслах бодис:
- бичил талст целлюлоза (E460), цармагжуулалтын өмнөх цардуул, кросповидон (E1202), магнийн стеарат (E572), коллоид цахиур (E551), поливинил алкоголь, титанийн хоёрч исэл (E171), тальк, макрогол, шар буурцгийн лецитин (E322), шар төмрийн исэл (E172), хар төмрийн исэл (E172), улаан төмрийн исэл (E172).

Валсар-Денк 160 бэлдмэлийн дүрслэл ба савлалт

Валсар-Денк 160мг нимгэн бүрхүүлтэй шахмал нь налуу ирмэг болон нэг талдаа хэрчлээс бүхий саарал улаан шар өнгөтэй,  зуйван хэлбэртэй, үл ялиг гүдгэр, нимгэн бүрхүүлтэй шахмал. Шахмалыг 2 тэнцүү хэсэгт хувааж болно.
28 ширхэг нимгэн бүрхүүлтэй шахмалыг блистерт савлан гаргана.

Үйлдвэрлэгч мэдээлэл

Савлагааны мэдээлэл