Багровен
10 мг
Лизиноприл – Lisinopril
Replek Farm Ltd Skopje
Эмийн хэлбэр: Шахмал

ЭРҮҮЛ МЭНДИЙН ДААТГАЛЫН ҮНИЙН ХӨНГӨЛӨЛТ

Үнийн дээд хязгаар: 750

ЭМД хөнгөлөх хэмжээ: 525

Даатгуулагч төлөх дүн: 225

Эмчийн ангилал:

C, D

А, В - Ангиллын эмийг өрх, сум, тосгоны эрүүл мэндийн төв, клиникүүд

С - Ангиллын эмийг нэгдсэн эмнэлэг, хэвтүүлэн эмчлэх ортой клиник, амаржих газар, тусгай эмнэлэгүүд,

D - Ангиллын эмийг зөвхөн төрөлжсөн мэргэшлийн эмнэлгийн эмч бичих эрхтэй

  • Цусны даралт ихдэх өвчин (эссенциаль) ба бөөрний шалтгаант (реноваскуляр) цусны даралт ихдэлт (бэлдмэлийг дангаар нь болон даралт бууруулах бусад эмтэй хавсарсан байдлаар); 
  • Зүрхний үйл ажиллагааны архаг дутагдал (бусад эмүүдтэй хамтран); 
  • Зүрхний цочмог шигдээс өвчин (эхний 24 цагийн хугацаанд өвчтөний гемодинамикийн үзүүлэлт хэвийн байгаа бол энэ байдлыг хадгалахболон зүүн ховдлын үйл ажиллагаа алдагдах, зүрхний дутагдал үүсэхээс сэргийлэх зорилгоор); 
  • Чихрийн шижингийн бөөрний эмгэгшил буюу нефропати (шээсээр альбумин алдагдахыг багасгах ба хэвийн даралттай инсулин хамааралт чихрийн шижин өвчтэй хүмүүс, мөн даралт ихтэй, инсулинүл хамааралтчихрийн шижин өвчтэй хүмүүст). 
  •  Лизиноприлд эсвэл бусад АХФ дарангуйлагч эмүүдэд харшилтай бол; 
  • Урьд судас мэдрэлийн хаван үүсч байсан өгүүлэмжтэй, энэ байдал ялангуяа АХФ дарангуйлагч эмүүдэд  үүсч байсан бол; 
  • Квинкийн хаван үүсэх   удамшлын хүчин зүйлтэй бол; 
  • 18 нас хүртэл насныхан (энэ насныханд энэ эмийн үр нөлөө ба аюулгүй байдлын судалгаа хийгдээгүй учраас ). 
  • Ууж хэрэглэнэ. Хэрэв даралт бууруулах өөр төрлийн эм хэрэглээгүй бол 5 мг тунгаар хоногт 1 удаа ууна.
  • Даралт буухгүй бол эмийн тунг 2-3 хоног тутамд  5 мг-р нэмэгдүүлсээр  эмчилгээний дундаж тунд (20-40 мг) хүргэнэ. (хоногийн тун 40 мг-с дээш болгосон ч  даралт буухгүй бол АД цаашид буурахгүйг анхаарна уу). Хоногийн барих тун – 20 мг. Хоногийн дээд тун – 40 мг.
  • Эмчилгээг эхэлснээс хойш   2-4 долоо хоногийн дараачаас эмчилгээний үр дүн бүрэн илэрнэ (тун боломжийн дээд түвшинд хүрсэн байж болно). Хэрэв эмчилгээний үр дүн хангалтгүй байгаа бол  бусад бүлгийн даралт бууруулах эмтэй хавсран хэрэглэх шаардлага гарна.
  • Хэрэв эмчлүүлэгч урьд нь шээс хөөх эм хэрэглэж байсан бол Багровен эмийг хэрэглэж эхлэхээс 2-3  хоногийн өмнөөс эхлэн энэ төрлийн эмийн хэрэглээг зогсоох хэрэгтэй. Хэрэв ингэх боломжгүй бол Багровены эхний тунг хоногт 5 мг-с илүү байлгаж болохгүй. Тэгээд бэлдмэлийн анхны тунг уулгаснаас хойш хэдэн цагийн турш эмчийн чанд хяналтад байлгах хэрэгтэй. Эмийн хамгийн дээд үйлдэл 6 цагийн дараа илэрдэг учраас энэ үед  артерийн даралт хэт буурах магадлалтайг анхаар.
  • Бөөрний шалтгаант даралт ихсэлт эсвэл ренин-ангиотензин-альдостероны хэмжээ ихэссэн бусад тохиолдолд эмийн эхний тунг аль болох багаар – 2,5-5 мг-р тогтоогоод эмчийн чанд хараа хяналтан дор байлгана. (АД-г хэмжих,бөөрний үйл ажиллагааг хянах, цусан дахь калийн хэмжээг хэмжих хэрэгтэй). Цаашдаа эмчийн байнгын хяналтан дор, АД-ын өөрчлөлтөөс хамааран  эмчилгээг  барих тунгаар  үргэлжлүүлнэ.
  • Бөөрний үйл ажиллагааны дутагдлын үед лизиноприлийн тунг тооцоход,  бөөрний үйл ажиллагаа,  бөөрөөр дамжин гадагшлах  эмийн хэмжээ,  өвчтөний  креатинины  клиренс, эмийн үйлчлэлд өгч буй хариу урвал  цусан дахь кали, натрийн хэмжээг харгалзан үзнэ. 
Креатинины клиренс мл/мин  Эхлэлийн тун хоногт мг-р 
30 – 70  5 – 10 
10 – 30  2,5 – 5 
10-с бага (диализ эмчилгээтэй хүмүүсийг оролцуулан)  2,5 
  •  Артерийн даралт тогтвортой өндөр байхад эмийг удаан хугацаанд барих тунгаар- хоногт 10-15 мг-р хэрэглэнэ.
  • Зүрхний үйл ажиллагааны архаг дутагдалтай хүнд – эмчилгээг хоногт 2,5 мг-р 1 удаа өгч эхлээд тунг аажмаар, 3-5 хоног тутамд 2,5 мг –р нэмсээр ердийн барих тунд 5-20 мг-д хүргэнэ. Хоногийн тунг  20 мг-с ихэсгэх  боломжгүй.
  • Ахимаг настанд  лизиноприлийн гадашлалтын хурд уудааширч,  даралт бууруулах үйлдэл нь  илүү удаан үргэлжлэх учраас  эмийн анхны тунг хоногт 2,5 мг-р эхэлж , харьцангуй бага тунгаар үргэлжлүүлэх шаардлагатай.
  • Зүрхний цочмог шигдээс (хавсарсан эмчилгээ байдлаар):
  • Эхний өдрүүдэд  хоногт – 5 мг, дараа нь нэг өнжөөд 5 мг тунгаар, хоёр өнжөөд  10 мг тунгаар өгөх ба дараа нь 10 мг тунгаар хоногт 1 удаа ууна. Зүрхний цочмог шигдээстэй хүнд бэлдмэлийг 6 долоо хоногоос доошгүй хугацаагаар хэрэглэх ёстой.
  • Зүрхний цочмог шигдээстэй, АД багатай (120 мм МУБ –с бага)  хүнд  хийгдэх эмчилгээний эхэнд  өөрөөр хэлбэл  эхний 3 хоногт бага тунгаар, хоногт – 2,5 мг-р эхэлнэ. Хэрэв АД (систолийн даралт 100 буюу түүнээс доош ммМУБ) бага байвал хоногт хэрэглэж байсан 5 мг тунг түр зуур 2,5 мг хүртэл бууруулах хэрэгтэй.  Харин АД бага хэмжээнд тогтвортой байсаар байвал(систолийн даралт  1 цагаас илүү хугацаанд 90 мм МУБ –с бага) багровен эмчилгээг зогсоох шаардлагатай. 

Тун хэтрэлт

  • Шинж тэмдгүүд (нэг удаад 50 мг тунгаар уусан үед): АД хэтэрхий буурах; ам хатах, нойрмоглох, шээс хаагдах, өтгөн хатах, тайван бус байдалд орох, цочирдох.
  • Эмчилгээ
    • шинж тэмдгийн, судсанд шингэн юүлэх, АД ба ус-эрдсийн тэнцвэрт байдлыг хянаж, хэвийн болгох арга хэмжээг авах.
  • Багровеныг  бие мах бодис гемодиализын аргаар  зайлуулах боломжтой. 

Байнга  тохиолддог гаж нөлөөнүүд

  • толгой эргэх, толгой өвдөх (эмчлүүлэгчдийн 5-6%-д), бие сульдах, гүйлгэх, хуурай ханиалга (3%), огих, бөөлжих, ортостатик гипотони(гэнэт босох үед  даралт буурч тархинд цусан хагамж алдагдах), арьсны тууралт, цээжээр өвдөх (1-3%). 

Бусад гаж нөлөө (давтамж < 1%)

  • Дархлааны тогтолцооны талаас илрэх гаж нөлөө: (0,1%) судас мэдрэлийн хаван (нүүр, уруул, хэл, хоолой залгиур, эсвэл багалзуур, хөл гар хавагнах).
  • Зүрх судасны тогтолцоонд:  АД их хэмжээгээр буурах, ортостатик гипотони, бөөрний үйл ажиллагааны дутагдал.
  • Төв мэдрэлийн тогтолцооны талаас: ядрамтгай болох,нойрмоглох, хөл гарын эсвэл уруулын булчингууд татвалзах.
  • Цус төлжүүлэх эрхтэн тогтолцооны талаас: цагаан эсийн тоо буурах (лейкоцит, нейтрофиль), агранулоцитоз(мөхлөгт эсгүйдэх), ялтаст эсийн тоо буурах (тромбоцитопени), удаан хугацаагаар эмчилгээг үргэлжлүүлсний дараа – гемоглобин ба гематокрит, эритроцитийн тоо бага хэмжээгээр буурах. 

Лабораторын үзүүлэлтүүд

  • цусанд кали, азот, шээсний хүчил, билирубины хэмжээ ихсэх,  «элэгний» ферментүүдийн идэвх нэмэгдэх. Энэ өөрчлөлт ялангуяа бөөрний өвчтэй, чихрийн шижинтэй, бөөрний судасны шалтгаант даралт ихдэлттэй хүмүүст илүү ажиглагддаг. 

Ховор тохиолддог гаж нөлөөнүүд:(менее 1%)

  • Зүрх судасны тогтолцоонд: зүрх дэлсэх; зүрхний хэм түргэсэх; зүрхний шигдээс; өндөр эрсдэл бүхий хүмүүст артерийн даралт буурсны улмаас тархины цусан хангамжийн дутагдал үүссэнээс  шалтгаалсан  цус харвалт.
  • Хоол боловсруулах замын талаас: ам хатах, хоолонд дургүйцэх, биж хам шинж, амтлах мэдрэмж өөрчлөгдөх, гэдэс өвдөх, нойр булчирхайн үрэвсэл, элэгний эсийн эсвэл цөс зогсонгишлын шарлалт, элэгний үрэвсэл.
  • Арьс салстын талаас: чонон хөрвөс, ихээр хөлрөх, арьс загатнах, арьс алаглаж цайх.
  • Шээс гадагшлуулах эрхтэн тогтолцоонд: бөөрний үйл ажиллагааны алдагдал, шээсний хэмжээ багасах, шээсгүйдэх, бөөрний цочмог дутагдал, шээсний хордлого, шээсээр уураг алдагдах.
  • Дархлааны эрхтэн тогтолцооны талаас: улаан эсийн тунах хурд (СОЭ) түргэсэх, үе мөч өвдөх ба эсийн бөөмийн эсрэг, эсрэг бие үүсэх.
  • Төв мэдрэлийн тогтолцоонд: астеник хам шинж, сэтгэл санааны тогтворгүй байдал, ухаан самуурах, бэлгийн сулрал. 

Бусад

  • булчин өвдөх,халуурах, ургийн хөгжилд сөргөөр нөлөөлөх . 
  • Ангиотензинхувиргагч ферментийг дарангуйлагч (АХФ) эмүүд нь ангиотензин I –с ангиотензин II үүсэх үйл явцыг саатуулж үйлчилдэг бөгөөд ангиотензин II –ын хэмжээ багассанаар альдостероны ялгаралт шууд багасдаг.  Брадикининыдеградац буурч простагландины нийлэгжилт нэмэгдэнэ.
  • Захын судасны ерөнхий эсэргүүцэл буурч, артерийн даралт (АД), зүрхэнд ирэх хэт ачаалал, уушгины хялгасан судасны даралт багасан, зүрхний минутын эзэлхүүн нэмэгдэж, зүрхний үйл ажиллагааныархаг дутагдалтай өвчтөний зүрхний булчингийн тэсвэрлэх чанар сайжирна. Артерийн судас илүү ихээр тэлэгдэнэ. Эмийн үйлдэл ямар нэгэн хэмжээгээр эдийн ренинангиотензины тогтолцоонд нөлөөлдөгтэй холбоотой байдаг.  Удаан хугацаагаар хэрэглэсний дараа зүрхний булчингийн томрол ба артерийн судасны зузаарал багасна.
  • Зүрхний булчингийн цусан хангамж дутагдалтай хэсгийн цусны эргэлтийг сайжруулдаг.
  • Ангиотензинхувиргагч ферментийг дарангуйлагч (АХФ) эмүүдзүрхний үйл ажиллагааныархаг дутагдалтай өвчтөний амь насыг уртасгаж, урьд нь шигдээсээр өвдсөн боловч үйл ажиллагааны дутагдал үүсээгүй өвчтөний зүүн ховдлын булчингийн үйл ажиллагаа алдагдах явцыг удаашруулдаг.  Эмийг хэрэглэснээс хойш ойролцоогоор 6 цагийн дараа даралт бууруулах идэвх эхэлж 24 цагийн турш үргэлжилдэг. Гэвч эмийн үйлдлийн үргэлжлэх хугацаа эмийн тунгаас хамааралтай байдаг. Эмчилгээний идэвх 1 цагийн дараа эхэлж,  6-7 цагийн дараа дээд хэмжээндээ хүрдэг. Артерийн даралт ихсэх үед, эмчилгээг эхэлснээс хойш эхний өдрүүдэд эмийн үйлдэлтогтворжиж эхлээд,  1-2 сар тасралтгүй хэрэглэсний дараа эмийн үйлдэл бүрэн тогтвортой болдог. Үүний дараа эмийн хэрэглээг гэнэт зогсооходартерийн даралт огцом ихсэхявдал ажиглагдахгүй.
  • Лизиноприлийг хэрэглэснээр АД буурахын зэрэгцээшээсээр уураг алдагдахыг (альбуминури) багасгана.
  • Лизиноприл, чихрийн шижин өвчтэй хүмүүсийнцусны сийвэн дэх саахарын хэмжээнд нөлөө үзүүлдэггүй бөгөөд цусны саахар гэнэт багасах үзэгдлийн давтамжийг өөрчлөхгүй ч цусанд саахар ихтэй өвчтөний, бөөрний түүдгэнцрийн эндотелийн үйл ажиллагааг хэвийн болгодог.   

Шимэгдэлт

  • лизиноприлийг ууж хэрэглэсний дараа ходоод гэдэсний замаас дунджаар 30% нь шимэгдэнэ. Биохүрэхүй нь 29%. Эмийн шимэгдэлтэд хоол хүнсний хэрэглээ нөлөөлөхгүй.   

Тархалт

  • цусны сийвэнгийн уурагтай бараг холбогддоггүй. Сийвэнд хуримтлагдах дээд тун (90 нг/мл), энэ хэмжээнд 7 цагийн дараа хүрнэ. Тархи нугасны хоригоор бага хэмжээгээр нэвтэрдэг. 

Хувиралд орох

  • лизиноприл бие мах бодид хувиралд ордоггүй. 

Гадагшлалт

  • бөөрөөр өөрчлөлтгүй байдлаар гадагшилдаг. Хагас гадагшлалтын хугацаа 12 цаг. 
  • Даралт бууруулах бусад бүлгийн эмүүдтэй хамт хэрэглэхэд  даралт бууруулах үйлдлийн хүч нь нийлбэржинэ. Кали хадгалагч шээс хөөх эмтэй (спиронолактон, триамтерен, амилорид) хамт хэрэглэх, калийн бэлдмэл, кали агуулсан хоолны давс орлуулагч хэрэглэх зэрэгт ялангуяа бөөрний үйл ажиллагааны дутагдалтай бол цусанд калийн хэмжээ ихсэх эрсдэл нэмэгдэнэ.
  • АХФ дарангуйлагчид ба СБҮЭ эмүүдийг хамт хэрэглэхэд бөөрний үйл ажиллагаа алдагдах эрсдлийг нэмэгдүүлэх ба ховор тохиолдолд калийн хэмжээ ихсэнэ.
  • Энэ бэлдмэлийг "Гогцооны" диуретикууд, тиазидын диуретикуудтэй хамт хэрэглэвэл даралт бууруулах нөлөө нь хүчжинэ. Ялангуяа шээс хөөх эмийн эхний тунг хэрэглэсний дараа артерийн даралт хамгийн ихээр буурдаг нь шээс ихээр хөөгдөж, эргэлдэх цусны эзэлхүүн багассанаас болоод лизиноприлийн үйлдлийн хүч ихэсдэгтэй холбоотой.  Мөн бөөрний үйл ажиллагаа алдагдах эрсдэл нэмэгдэнэ.
  • Индометацинтай хамт хэрэглэхэд лизиноприлын даралт бууруулах идэвх буурна, учир нь СБҮЭ эмүүд  простагландины (простогландин нь АХФ дарангуйлагчийн даралт бууруулах үйлдэлд тодорхой үүрэг гүйцэтгэдэг) нийлэгжлийг багасгадаг.
  • Инсулин ба сульфонилмочевины уламжлалын саахар бууруулагч эмүүдтэй хамт хэрэглэх үед цусан дахь саахарын хэмжээ хэт буурах эрсдэлтэй.
  • Клозапинтай хамт хэрэглэвэл цусны сийвэн дэх клозапины түвшрүүлгийн хэмжээ ихсэнэ. Литийн карбонаттай хамт хэрэглэх үед цусны сийвэнд литийн хэмжээ ихсэж  литийн хордлого үүсгэнэ.
  • Чихрийн шижин өвчтэй хүмүүс бэлдмэлийг ловастатинтай хамт хэрэглэх үед  хүнд хэлбэрийн гиперкалиеми (цусанд кали ихсэлт)үүсдэг.
  • Перголидтой хамт хэрэглэхэд артерийн даралт хүчтэй буурч байсан.
  • Этанолтой (спирттэй) хамт хэрэглэвэл этанолын үйлдэл ихсэнэ. 

Болгоомжтой хэрэглэх заалт

  • Бөөрний үйл ажиллагааны илэрхий дутагдал, хоёр бөөрний артерийн нарийсал  эсвэл өрөөсөн бөөрнийх хэдий ч бөөрний үйл ажиллагааны дутагдал (азотеми) даамжирч байгаа бол, бөөр шилжүүлэн суулгуулсны дараа, бөөрний дутагдал, азотеми-цусанд азотын үлдэгдэл ихсэх, цусанд калийн хэмжээ ихсэх, аортын нарийсал, зүрхний булчингийн томролттой бөглөрөлт кардиомиопати, альдостероны хэмжээ анхдагчаар ихсэх, артерийн даралт буурах, тархины цусан хангамжийн алдагдал (түүний дотор тархинд цусан хангамж дутагдах), зүрхний булчингийн цусан хангамжийн дутагдал, титэм судасны дутагдал, холбогч эдийн аутоиммунны системийн өвчин (түүний дотор склеродерми, системийн улаан чоно яр); ясны  чөмөгний үйл ажиллагаа алдагдсан; натри хязгаарласан хоол хүнс хэрэглэж байхад; судсаар эргэлдэх цусны хэмжээ буурсан үе (гүйлгэлт, бөөлжилт зэрэг шалтгаанаар); ахимаг насныханд.

Онцгой анхааруулга

  • Шинж тэмдгийн даралт бууралт
    • Шээс хөөх эмийг хэрэглэх, хоолондоо давс бага хэрэглэх, гүйлгэх, бөөлжих үед эргэлдэж буй цусны эзэлхүүн багассаны улмаас даралт ихээр буурдаг.
    • Зүрхний үйл ажиллагааны дутагдалтай өвчтөнд бөөрний дутагдалтай эсвэл  дутагдал үүсээгүй байсан ч   АД ихээр буурах эрсдэлтэй байдаг.  Гэхдээ ийм хүндрэл ихэвчлэн зүрхний үйл ажиллагааны дутагдлын хүнд хэлбэрийн үед их хэмжээний шээс хөөх эм хэрэглэсний улмаас ажиглагддаг. Тиймээс эдгээр өвчтөнд  Багровен эмчилгээг эмчийн  чанд хяналтан дор ( эдгээр эмүүдийн тунг нарийн тохируулж) болгоомжтой хэрэглэх ёстой.
    • Дээрх зарчмыг мөн зүрхний ба тархины  цусан хангамжийн дутагдалтай, даралт их хэмжээгээр буурах үед зүрхний шигдээс үүсэх болон тархинд ишемийн харвалт үүсэх өндөр эрсдэлтэй хүмүүст баримтлах нь зүйтэй.
    • Даралт түр хугацаагаар хэт буурах урвал нь энэ эмийг огт хэрэглэхгүй байх үндэслэл болохгүй.
    • Багровеныг хэрэглэх үед зарим зүрхний үйл ажиллагааны архаг дутагдалтай боловч хэвийн эсвэл бага даралттай өвчтөнд  АД буурах ч энэ нь ихэнх  тохиолдолд эмчилгээг зогсоох үндэслэл болохгүй.
    • Багровен эмчилгээг эхлэхийн өмнө цусан дахь натрийн хэмжээг боломжийн хэрээр хэвийн болгож, эргэлдэх цусны хэмжээг нөхөж өгөх ба багровен эмийн эхний тунгийн үйлчлэл, түүнд үзүүлэх хэриу урвалын байдлыг сайтар ажиглах хэрэгтэй.
    • Бөөрний артерийн нарийслын үед (ялангуяа хоёр бөөрний эсвэл ганц бөөртэй хүний бөөрний артерийн нарийсал), мөн түүнчлэн цусан дахь натри ба шингэний хэмжээ бага байгаагаас шалтгаалсан цусны эргэлтийн дутагдлын үед багровенийг хэрэглэвэл бөөрний үйл ажиллагааг хямрааж, бөөрний цочмог дутагдалд хүргэж болзошгүй  бөгөөд эмийн хэрэглээг зогсоосон ч бөөрний ажиллагаа дахин сэргэхгүй байх нөхцөл үүснэ. 
  • Зүрхний цочмог шигдээс өвчинд хэрэглэх
    • Зүрхний цочмог шигдээс өвчинд  тромболитикүүд, (ялтаст эсийн бөөгнөрөмтгий чанарыг бууруулагч эм), ацетилсалицилийн хүчил, бета-адреноблокаторуудыг хэрэглэдэг. Гэвч багровенийг нитроглицеринтэй  (судсанд болон арьсан дээр наах хэлбэрээр) хамт хэрэглэж болно. 
  • Мэс заслын ажилбар /ерөнхий унтуулга
    • Том хэмжээний хагалгааны үед мөн даралт бууруулах үйлдэл бүхий өөр бусад эмүүдийг хэрэглэж байх үед ангиотензин II-ийн үүсэлтийг дарангуйлагч үйлдэлтэй лизиноприл хэрэглэвэл АД удирдлагагүйгээр буурах эрсдэлтэй.
    • Ахимаг настанд  ердийн тунгаар хэрэглэхэд энэ эмийн цусан дахь түвшрүүлэг нь харьцангуй өндөр байдаг.  Тиймээс, хэдийгээр багровений  эмийн үйлдэл нь ахимаг ба залуу настанд адил байдаг ч ахмад настанд  энэ эмийн тунг тун болгоомжтой сонгох хэрэгтэй.
    • Мөн агранулоцитоз үүсгэх эрсдэл өндөр байдгийг мартаж болохгүй бөгөөд өвчтөний цусны шинжилгээг үе хийж нягталж байх шаардлагатай.
    • Диализ эмчилгээг полиакрил-нитрилийн шүүлтүүрээр хийлгэж буй эмчлүүлэгчид  энэ бэлдмэлийг хэрэглэх үед анафилаксийн шок үүсч болзошгүй, тиймээс  диализыг өөр шүүлтүүр ашиглан хийх эсвэл даралт бууруулах өөр эм хэрэглэхийн аль нэгийг сонго.

Жолоо барих зэрэг сэтгэц оюуны өндөр анхаарал, самбаа шаардагддаг хөдөлмөр эрхлэхэд нөлөө үзүүлэх эсэх

  • Багровен бэлдмэлийг ердийн тунгаар хэрэглэж байхад жолоо барих зэрэг сэтгэц оюуны өндөр анхаарал, самбаа шаардагддаг хөдөлмөр эрхлэхэд нөлөө үзүүлдэг эсэх нь одоогоор тогтоогдоогүй ч энэ бэлдмэлийг хэрэглэх үед эмчлүүлэгчийн толгой эргэдэг учраас болгоомжтой байх хэрэгтэй. 
  • Багровен бэлдмэлийг жирэмсэн үед хэрэглэхийг хориглодог. Энэ эмийг хэрэглэж байх үед жирэмсэлсэн нь нотлогдвол эмийн хэрэглээг тэр даруй зогсооно.
  • АХФ –г дарангуйлагч эмүүдийг жирэмсний II ба III гурван сард хэрэглэвэл  ургийн артерийн даралт хэт буурах, бөөрний дутагдалд орох, цусанд кали ихсэх, гавал тархины өсөлт хоцрогдох, ураг амьгүй болох  зэрэг сөрөг нөлөө үзүүлдэг.
  • Харин жирэмсний эхний 3 сарын хугацаанд урагт хэрхэн нөлөөлдөг нь одоогоор тодорхойгүй.
  • Эх дотроо АХФ дарангуйлагч эмийн нөлөөнд өртөж байсан нярайн биеийн байдлыг нарийн ажиглаж, түүний АД буурах, шээс ховордох, цусанд нь калийн хэмжээ ихсэх үеийг алдалгүй илрүүлж, эмчилж байх шаардлагатай.
  • Лизиноприл эхэсээр  чөлөөтэй нэвтэрдэг. Хөхний сүүнд нэвтэрдэг эсэх нь тодорхойгүй. Гэвч хөхүүл эх энэ эмийг хэрэглэх бол хүүхдээ хөхүүлэхээс татгалзах ёстой. 

Эмийн хэлбэр

  • 5мг, 10, 20 мг-р тунлагдсан 10 ширхэг шахмалыг блистерт багцлан хийсэн.
  • 2 эсвэл 3 блистерийг хэрэглэх зааврын хамт цаасан хайрцагт савласан. 

Хадгалах  нөхцөл

  • Нарны шууд тусгалаас хамгаалагдсан, чийглэг багатай орчинд,  25°С-с дээшгүй хэмд хадгална.
  • Хүүхэд хүрэхээргүй газарт хадгал. 

Хадгалах хугацаа

  • Хадгалах хугацааг хайрцаг дээр бичсэн байдаг. Хадгалах хугацаа нь дууссан бэлдмэлийг хэрэглэж болохгүй. 

Худалдааны эрх ба  бүртгэлийн  гэрчилгээг  эзэмшигч

Англи улс. Лондон хот. Belinda Laboratories LLP 

Үйлдвэрлэгч: 

Македони улс. 1000 Скопье, ул. Козле 188, Реплек Фарм Лтд. 

Шинээр нэмэгдсэн:

Засвартай байна...

Энэхүү платформ нь энгийн иргэдэд зориулагдаагүй зөвхөн анагаах ухааны салбарын мэргэжилтнүүдэд зориулагдсан болно. Дур мэдэн өөрийгөө эмчлэхийг хориглоно ! Дур мэдэн хийсэн үйлдлээс гарах үр дагаврыг бид хариуцахгүй.

Бид күүки буюу үйлдлийг бүртгэх технологи ашиглан тодорхой төрлийн мэдээллийг хадгалах ба энэ нь үйлчилгээг сайжруулах, түүнд дүн шинжилгээ хийх зорилготой юм. Таны мэдээлэл бусдад дамжуулагдахгүй.