Шингэний хурмтлал ба зүрхний дутагдал

• Пиоглитазон нь шингэний хуримтлал үүсгэдэг тул зүрхний дулагдлыг түргэсгэх эсвэл хүндрүүлж болзошгүй. Зүрхний зогсонгишилт дутагдалд хүргэх ямар нэгэн эрсдэлт хүчин зүйлтэй  (жишээлбэл зүрхний шигдээс болж байсан, титэм судасны эмгэгийн шинж тэмдэг илэрсэн) өвчтөнд эмч эмчилгээг хамгийн бага тунгаар эхэлж аажимаар тунг ихэсгэнэ. Зүрхний дутагдлын шинж тэмдэг илэрсэн, жин нэмсэн, хавагнасан ялангуяа зүрхний ажиллах чадварын нөөц багассан өвчтөнг сайтар хянаж байх шаардлагатай. 
• Пиоглитазоныг инсулинтай хамт хэрэглэсэн өвчтөнд болон зүрхний дутагдлын өгүүлэмжтэй өвчтөнд зүрхний дутагдалт илэрсэн тохиолдол бүртгэгдсэн. Тиймээс Пиоглитазоныг инсулинтай хамт хэрэглэж болохгүй. СБҮЭЭ болон Пиоглитазон нь  шингэн хуримтлал үүсгэдэг тул хавсарч хэрэглэх нь хаван үүсгэх эрсдлийг нэмэгдүүлнэ.
• Зүрх судасны талаас ямар нэгэн эмгэг шинж тэмдэг илэрсэн тохиолдолд Пиоглитазоныг зогсоох шаардлагатай.  75-с дээш насны өвчтөнд хэрэглэсэн туршлага байдал хязгаарлагдмал тул энэ бүлэгт болгоомжтой хэрэглэх шаардлагатай. 

Элэгний үйл ажиллагааг хянах нь

• Зах зээлийн дараах судалгаагаар ховор тохиолдолд элэгний эсийн үйл ажиллагааны алдагдал үүсч байсан нь мэдээлэгдсэн. Тиймээс Пиоглитазон эмчилгээ хийлгэж байгаа нөхцөлд элэгний ферментийг үечлэн хянаж байхыг зөвлөдөг. Бүх өвчтөнд Пиоглитазон эмийн эмчилгээг эхлэхийн өмнө элэгний ферментийг шалгах хэрэгтэй. Элэгний фермент ихэссэн (АЛАТ>2.5 х хэвийн дээд хэмжээ) болон элэгний бусад эмгэгтэй өвчтөнд Пиоглитазон эмчилгээг эхлэхгүй. 
• Эмнэлзүйн үнэлгээнд суурьлан Пиоглитазон эмийн эмчилгээг эхэлсэн цагаас хойш элэгний ферментийг үечлэн хянаж байх хэрэгтэй. Хэрэв Пиоглитзаон эмчилгээний үед АЛАТ-ын хэмжээ хэвийнийхээс  3 дахин ихэсвэл элэгний ферментийн шинжилгээг аль болох хурдан дахин хэмжих хэрэгтэй. Хэрэв 3 дахин ихэссэн хэвээр байвал эмчилгээг зогсооно. Хэрэв өвчтөн тодорхойгүй байдлаар дотор муухайрах, бөөлжих, хэвлийгээр өвдөх, ядрах, хоолны дуршилгүй болох болон шээсний өнгө харлах зэрэг элэгний үйл ажиллааны алдагдлын шинж илэрсэн нөхцөлд элэгний ферментийн шинжилгээ өгөх хэрэгтэй. Пиоглитазон эмчилгээг үргэлжлүүлэх эсэхийг лабораторийн шинжилгээний хариуг үндэслэн шийдэх хэрэгтэй. Хэрэв шарлалтын шинж тэмдэг ажиглагдвал эмчилгээг зогсоох хэрэгтэй. 

Жин нэмэгдэх

• Эмнэлзүйн туршилтаар Пиоглитазон нь тунгийн хамааралтайгаар жин нэмдэг болох нь нотлогдсон бөгөөд энэ нь өөх тосны хуримтлал үүссэнтэй холбоотой байж болох ба зарим тохиолдолд шингэний хуримтлалаас шалтгаалдаг байна. 
• Зарим тохиолдолд жин нэмэгдэх нь зүрхний дутагдлын шинж тэмдэг байж болох тул жинг сайтар хянаж байх хэрэгтэй.
• Чихрийн шижингийн эмчилгээний нэг хэсэг бол хооллолтын дэглэм байдаг. Өвчтөн хоолны калорийг хянаж, дэглэм барих хэрэгтэй.  

Цус судлалын талаас

• Пиоглитазон эмчилгээний үед гемоглобин болон гематокрит бага зэрэг буурч цус шингэрдэг. 
• Пиоглитазонтой харьцуулсан хяналтат судалгаагаар Метформин хэрэглэсэн өвчтөнд ижил өөрчлөлт (гемоглобин болон гематокрит харьцангуй бууралт) ажиглагдсан бол Сульфонилуриа хэрэглэсэн бүлэгт харьцангуй бага өөрчлөлт (гемоглобин болон гематокрит харьцангуй бууралт) ажиглагдсан байна.  

Гипогликеми

• Инсулин мэдрэг чанар өссөн нөхцөлд Пиоглитазоныг хавсарсан болон гурвалсан эмчилгээнд Сульфонилуриа-тай хавсархад тунгийн хамааралтайгаар гипогликеми үүсч болзошгүй тул Сульфонилуриагийн тунг бууруулах шаардлага гарч болох юм.  

Нүдний эмгэг талаас

• Эмийн зах зээлийн дараах судалгаагаар Пиоглитазоныг оролцуулаад Тиазолидиндион бүлгийн эм нь чихрийн шижингийн үеийн шар толбоны хаван  үүсгэх болон даамжруулан харааны тод харах чадамжийг бууруулсан мэдээлэл байдаг. 
• Эдгээр өвчтний олонхид нь захын хаван дахин үүссэн нь мэдээлэгдсэн. Пиоглитазон болон шар толбоны хаван шууд хамааралтай эсэхийг бүрэн тогтоогоогүй байгаа ч эмч эмийг бичихдээ шар толбоны хаван үүсч болохыг санаж байх хэрэгтэй бөгөөд хэрэв өвчтөнд  харааны өөрчлөлт илэрвэл нүдний талаас лавлан тодруулах хэрэгтэй.  

Бусад

• Инсулины үйлдлийг нэмэгдүүлсэнтэй холбоотойгоор Пиоглитазон нь өндгөвчний олон уйланхайт хам шинжтэй өвчтөнд овуляцийг дахин идэвхижүүлж болох юм. Эдгээр өвчтөн жирэмсний эрсдэлтэй болж болзошгүй тул  түүнээс сэргийлж, жирэмсэн болох гэж буй болон жирэмсэлсэн нөхцөлд эмчилгээг зогсооно. 
• Энэхүү шахмал нь лактоз моногидрат агуулдаг тул Lapp лактаз дутагдалтай, глюкоз-галагтоз шимэгдэлт буурсан буюу галактозод тэсвэргүй ховор тохиолдох удамшлын асуудалтай өвчтөнд хэрэглэхгүй.
• Пиоглитазон эмчилгээг эхлэхийн өмнө давсагний хавдрын эрсдэлтэй эсэхийг үнэлэх хэрэгтэй (эрсдэлд: нас, тамхидалтын байдал, аарцгийн хөндийн хэсэгт туяа эмчилгээ хийлгэсэн, циклофосфамид зэрэг химийн эмчилгээ хийлгэсэн гэ мэт) .
• Пиоглитазон эмчилгээг эхлэхээс өмнө нүдэнд үзэгдэхүйц гематури байгаа эсэхийг нягтлах хэрэгтэй. Эмчилгээний явцад илэрхий гематури болон дизури эсвэл шээсний талаас ноцтой өөрчлөлт бүхий шинж тэмдэг илэрсэн тохиолдолд эмчид хандаж зөвлөгөө авах хэрэгтэй.
• Пиоглитазоныг нэг болон түүнээс дээш жил хэрэглэж байгаа өвчтөнд давсагны хавдрын шинжилгээ тогтмол хийлгэж байх хэрэгтэй.

Машин жолоодох болон машин механизмтай ажиллах чадварт үзүүлэх нөлөө

• Пиоглитазон жолоо барих болон машин механизмтай ажиллах чадварт нөлөө үзүүлдэггүй болох нь тогтоогдсон.