Мэс заслын өрөөнд туслах нь

Бүх л мэс засалчдад мэс заслын үеэр туслагч ихэвчлэн шаардлагатай байдаг. Мэс заслын өрөөнд байгаа оюутан эсвэл мэс заслын дадлагажигч, резидентийн хувьд та амжилттай мэс засал хийхэд бусад багийн гишүүдийн нэгэн адил чухал хувь нэмэр оруулах боломжтой.

Мэс заслын өрөөнд цагийг үр дүнтэй өнгөрүүлж, мэс засалд туслах нь үр бүтээлтэй суралцах боломж болох тул дараах хэдэн үндсэн зарчмыг дагаж мөрдөөрэй.

Мэс заслын өмнө

• Маргааш оролцохоор төлөвлөж буй мэс заслын жагсаалтыг өмнөх өдөр нь шалга.
• Хийгдэх мэс засал, түүний заалтын талаарх дэлгэрэнгүй уншиж, мэдээллийг тэмдэглэж ав.
• Хийгдэх мэс засал болон холбогдох анатомын талаар уншиж судал; энэ нь мэс заслын өрөөнд илүү ихийг сурч, оролцох боломжийг нэмэгдүүлнэ.
• Хэрэв өвчтөний биеийн ерөнхий байдал харьцангуй сайн байгаа бол мэс заслын өмнө түүнтэй уулзаж, шаардлагатай бол түүх асуумж авах болон үзлэг хийхийг оролдоорой (оюутнууд).

Мэс заслын үеэр

• Мэс заслын өрөөнд орохдоо бүх ажилтнуудад өөрийгөө танилцуулж, шаардлагатай бол тухайн хагалгаанд оролцогсдын бүртгэл, хуудсанд орсон эсэхээ шалгаарай.
• Хэрэв мэс засалд оролцохоор бэлтгэж байгаа бол мэс заслын сувилагчаас зөвшөөрөл болон зааварчилгаа аваарай.
• Бэлтгэл хангасныхаа дараагаар өөрийн чадварын түвшинд үнэнч байгаарай. Хэдийгээр аль болох ихийг хийхийг хүсэж болох ч чадвар хүрэлцээгүй ажлыг хийх нь өвчтөнийг эрсдэлд оруулж болзошгүй тул үргэлж өвчтөний аюулгүй байдлыг нэн тэргүүнд тавих хэрэгтэй.
• Мэс заслын явцад анхаарлаа хандуулж, сонсож, мэс засалчийн харааны талбайгаас гараа хол байлгаарай.
• Хэрэв та мэс заслын үйл явцад идэвхтэй оролцох үүрэггүй боловч ариун халат, бээлийтэй бол гараа болгоомжтой өвчтөн дээр байрлуулж, талбайг хаах эсвэл ариун биш зүйлд хүрэхээс сэргийлээрэй.
• Хэрэв таны бие сульдаж мэдрэгдсэн тохиолдолд, мэс заслын ширээнээс холдож, ойрхон байгаа сувилагч ажилтнуудад мэдэгдээд сууж амраарай.

Мэс заслын дараа

• Хэрэв цаг зав байгаа бол, мэс засалчтай мэс заслын талаар ярилцаж, юуг анхаарах, эсвэл ойлгомжгүй зүйл байсан бол түүнийгээ асууж ярилцаарай.
• Боломжтой бол мэс заслын дараа өвчтөний биеийн байдлыг ажиглаж, боолт, давтан үзлэг дээр нь ч мөн мэс засалчийн хамт байж эдгэрэлт, явцыг ажиглаж суралцаарай.

Бяцхан зөвлөгөө

• Хийгдэх гэж буй мэс засал болон холбогдох анатомиын талаар мэс заслын өмнө уншиж судал.
• Хэрэв би энэ мэс заслыг хийж байгаа бол туслагч юу хийвэл хамгийн сайн туслах вэ? гэж өөрөөсөө асуугаарай.
• Мэс засалчид өөрсдийн ажлын талаар ярилцах дуртай байдаг, тиймээс асуулт асууж сурч, нээлттэй харилцаарай. Зарим анатомийн хэсгийг үзүүлсэн үед зөвхөн толгой дохих биш, мэдэх зүйлийнхээ талаар ярилцаарай.
• Мэс заслын өмнөх өдөр мэс заслын жагсаалтыг заавал шалгаж, оролцох мэс заслынхаа талаар уншаарай. Хэрэв та мэс заслын талаар мэдлэгтэй байгаагаа харуулбал танд зарим хэсгийг гүйцэтгэх боломжийг олгох магадлалтай (резидентүүдэд)
• Та энэ мэс засалд сонирхолтой, оролцож байгаагаа харуулахын тулд асуулт асууж болох ч асуултаа зөв цагт тавих хэрэгтэй. Жишээ нь: мэс засалч цус алдалтыг шийдвэрлэж байх үед асуух нь тохиромжгүй юм.

Харин та юу нэмж зөвлөх вэ?