Нүүрний анатомийн сургалтын шинэ чиг хандлага буюу 3D фотограмметр ба VR технологи.

Мэс заслын нарийн ур чадварыг эзэмшихэд анатоми бол хамгийн гол суурь мэдлэг байдаг. Гэвч бидний олонх нь сурах явцдаа анатомийн гурван хэмжээст ойлголтыг атлас ном, зурагт материал гэх мэт 2 хэмжээст эх сурвалжаас бүрэн авч чаддаггүй. Кадаверийн (задлан) сургалт бол алтан стандарт гэж тооцогддог ч үнэтэй, хязгаарлагдмал, ёс зүйн асуудалтай учир өдөр тутмын сургалтад ашиглах боломж хязгаарлагдмал билээ.

Тэгвэл сүүлийн жилүүдэд технологийн дэвшил ашиглан энэ бэрхшээлийг шийдэх шинэ арга гарч иржээ. PRS Global сэтгүүлийн 2025 оны 7-р сарын дугаарт АНУ-ын Mayo Clinicийн багийн Hussein, Sara M. MD^*,†; Emanuels, Andrew F. MD^*; Leonel, Luciano César P.C. PhD^‡,§; Lachman, Nirusha PhD^§; Peris Celda, Maria MD, PhD^‡,§; Morris, Jonathan M. MD^¶; Sheahan, Eric M. BA^§; Martinez, Erick O. BFA^∥; Hanson, Christian R. BA^∥; Sharaf, Basel A. MD, DDS, FACS^*,†,** нарын нийтлүүлсэн 3 хэмжээст фотограмметр болон хийсвэр орчин (VR)-ыг нэгтгэн нүүр, хүзүүний анатоми заах инновацлаг аргачлал гэх артиклыг та бүхэнд хураангуйлан хүргэж байна.

Зохиогчид шинэ кадаверийн толгойг үе шаттайгаар, нүүр ба хүзүүний гүн ба өнгөц бүх давхаргыг ил гарган гаргалгаа хийсэн байна. Гаргалгааны алхам бүр дээр тусгайлан тохируулсан 5 DSLR камераас бүрдэх систем, мөн гар 3D камер ашиглан 360° дүрслэл авчээ. Дараа нь эдгээр зургуудыг тусгай программ (Photomatix Pro, Autodesk 3ds Max, Adobe Substance 3D Painter) ашиглан нэгтгэж, нарийвчилсан өндөр нягтралтай 3D загвар болгон боловсруулсан байна.

Эцэст нь Unity 3D програм дээр оруулж, VR орчин болон холограмм дэлгэц дээр үзэх боломжтой болгосон. Энэ бүхний үр дүнд суралцагч анатомийн давхаргыг нэг нэгээр нь нээж үзэх, судас, мэдрэлийн нарийн бүтэцтэй танилцах, 360° өнцгөөс харж судлах боломжтой болгожээ.

Фотограмметрийн сул тал нь мэдрэл, судас зэрэг нарийн бүтэцтэй хэсгийг ялгаж харуулахад бэрхшээлтэй байдаг ч үүнийг баг өнгө ялгаралттай дэвсгэр ашиглах, гэрэлтүүлгийг сайжруулах зэргээр шийдвэрлэж, 3D загварыг эмч нарт хэрэглэхүйц нарийвчлалтай болгож чаджээ.

Эхний туршилтын сургалт, семинаруудад оролцсон резидент эмч нарын зүгээс:  

• Хичээл илүү сонирхолтой, идэвхтэй болж байна,
• Орон зайн төсөөлөл тодорхой болсон,
• Мэс засал хийх итгэл нэмэгдсэн гэх зэрэг эерэг үнэлгээ өгчээ.

Тэгвэл эстетик болон нөхөн сэргээх пластик мэс заслын практикт нүүр, хүзүүний гоо сайхны мэс засал, тухайлбал face lift, neck lift зэрэг нь мэдрэл, судас ихтэй хэсэгт хийдэг нарийн ажилбарууд байдаг. Эдгээрийг зөвхөн атлас эсвэл 2D зурагнаас ойлгоно гэдэг хангалтгүй. Харин VR орчинд бодит мэтээр бүтцийн бүх давхаргыг шат дараатайгаар судлах боломж нь мэс заслын сургалтыг сайжруулж, дадлагажихад илүү бодитой тус болохоор байна.

Хамгийн олзуурхууштай, давуу тал нь боловсруулсан 3D загваруудыг QR кодоор дамжуулан дэлхийн хаанаас ч ашиглах боломжтой болгожээ. Ингэснээр ямар ч улс орны эмч, резидент гар утас, VR төхөөрөмж ашиглан өөрийн биеэр кадавер анатоми судалж байгаа мэт туршлага авах боломжтой болсон гэсэн үг.

Судлаачдын үзэж буйгаар дараагийн алхам бол хиймэл оюун ухааныг ашиглах буюу AI -аар сургалтын явцыг шинжилж, оролцогчийн алдаа, ахицыг дүгнэн хувь хүнд тохирсон санал зөвлөгөө өгөх юм. Энэ нь сургалтыг улам хувь эмчид тохирсон, үр дүнтэй болгох том боломжийг нээж өгч байна.

Миний хувьд ч мөн кадавер сургалт хийх боломж, нөхцөл муу Монголын нөхцөлд энэ мэт VR технологийг сургалтандаа нэвтрүүлэх нь бид бусдаас дутахгүй, өрсөлдөх чадвартай мэс засалчид болон бэлтгэгдэх тун таатай боломж гэж бодож байна.