Magnetic Particle Imaging (MPI) — Цацраггүй үе эхлэх үү?

1895 онд Вилхелм Конрад Рентген анхны рентген туяаг нээснээр анагаах ухааны дүрс оношилгооны шинэ эрин үеийг эхлүүлсэн. Өнөөдөр рентген туяа нь ясны хугарал, шүд, эрүү, уушги, зүрх судасны эмгэгүүд, мөн артерийн нарийсал, судасны бөглөрөл, аневризм зэрэгт оношилгоо болон эмчилгээнд өргөн хэрэглэгдэж байна. Ялангуяа ангиографи буюу судасны рентген зураг нь мэс заслын явцад судасны байрлал, хөдөлгөөн, реакц болон багажийн байрлалыг шууд хянах боломж олгодог.

Соронзон партикелийн дүрслэл (MPI) – шинэ гарц

Ийм зураг авалтад тодосгогч бодисыг судсанд шахаж, рентген туяатай хослуулан ашигладаг ч цацрагийн ачаалал болон йод агуулсан тодосгогч бодистой тул эрсдэлтэй байдаг.
Германы Вюрцбургийн их сургуулийн физикч доктор Патрик Фогель болон түүний багийнхан хүний биед тохирсон анхны MPI сканнерийг бүтээж, Вюрцбургийн их сургуулийн эмнэлгийн радиологийн багийн доктор Виктор Хартунгтай хамтран бодит туршилт хийжээ. MPI технологи нь зөвхөн соронзон шинж чанартай партикелийг илрүүлдэг бөгөөд хурдан, нарийвчлалтай дүрслэл хийх боломжтой. Үүнээс гадна ямар ч ионжуулагч цацраг хэрэглэдэггүй мөн оношилгооны үед гардаг нэмэлт дуу чимээгүйгээрээ онцлог юм байна.

Тасралтгүй (хиймэл) урсгалын үед судлаачид MPI зориулалтын трайсер болон рентген тодосгогч бодисын холимогийг гуяны артерид тарьсан байна. Үүний дараа MPI болон уламжлалт дижитал субтракцийн ангиографи (DSA) зэрэгцэн ашиглагдаж, дүрс бичлэг хийгдсэн.

Зурагт гуяны дээгүүр байрласан илгээх ба хүлээн авах ороомог бүхий сканнерийн модулиуд (B), хяналтын хэсэг (C), ерөнхий бүтэц (D) болон судасыг (A) харуулсан байна.
Зургийн эх сурвалж: Hartung V, Gruschwitz P, Augustin AM нар, Communications Medicine 2025 (CC BY 4.0)

MPI сканнер нь клиник бусад тоног төхөөрөмжтэй нийцэл сайтай хэрэглэхэд хялбар байсан бөгөөд судсыг маш тод, нарийвчлалтай дүрсэлсэн байна. Ашигласан Perimag® (2 мл) болон Resotran® (1.5 мл) гэсэн хоёр төрлийн тодосгогч бодис нь хүний биед үзүүлэх гаж нөлөөгүй учир цаашид клиник хэрэглээнд нэвтрүүлэх үйл явцыг хурдасгах боломжтой гэж судлаачид үзэж байна.

Ирээдүйн чиг хандлага

Доктор Виктор Хартунг MPI технологи нь ирээдүйд уламжлалт рентген ангиографийг зарим тохиолдолд бүрэн орлох боломжтой гэж онцолжээ. Энэ нь ялангуяа бөөрний эмгэгтэй өвчтөнүүд болон цацрагт мэдрэмтгий хүмүүст илүү тохиромжтой. Мөн эмч, мэс засалчдын ажлын байрны цацрагийн ачааллыг ч эрс бууруулах давуу талтай.

MPI нь одоогоор хүн дээрх туршилтын шатандаа орж байгаа бөгөөд анхны судалгааны үр дүн эмнэлзүйн практикт нэвтрэх боломжтойг баталж өгч байна.

—

Эх сурвалж: Universitätsklinikum Würzburg